D a y u h a n

Nakasimangot ka na lang palagi
Kulubot sa mukha mo tuloy dumadami
Sa mga simpleng bagay ikay nayayamot
Ano bang nangyayari, puso mo’y puno ng poot?

Ngumingiti ka nga kung minsan
kaso halatang mapakla naman
Sa suot mong maskara ay kitang-kita
na para kang walang buhay na kanta

Kung ako'y pakialamero, nawa'y pagpasensyahan mo
pakikipagkaibigan lang naman ang nais ko sa'yo
kaso hindi ka naman nakikinig sa mga sinasabi ko
pinagsasawalang-bahala mo lang ako

Matagal na nga sana kitang iniwan
Ngunit hindi ko magawa-gawa, haaay…ewan
Mapagaan lamang ang bigat ng loob mong pasan-pasan
Daig ko pa ang nanunungkit ng mga bituin at buwan

Hindi mo maitatago , puso mong sugatan
bihag ka pa rin ng bangungot ng iyong nakaraan
Gayunpama’y nandito lang ako lagi sa tabi mo
Sasamahan at gagabayan kita, pangako

…pagkat ikaw

ay walang iba kundi ako…